本書介紹愛爾蘭的歌曲背景故事，用本土觀點介紹愛爾蘭反叛歷史文化。
包括愛喝酒、唱歌的愛爾蘭人的酒歌；抗爭、爭自由的反叛之歌；大飢荒、優美悲慘的移民之歌和愛及失落的歌。
一首歌，一個故事，搭配作者的插畫。除了讓讀者可以認識愛爾蘭好聽的歌以外，還能透過作者的素描，欣賞愛爾蘭的景緻。
全書為台語漢羅書寫，每一首歌都翻譯做台文，是台灣很少見的台語文翻譯的愛爾蘭歌，也很適合用來學習台語文。

序

佮李南衡先生做朋友，大約是40年前開始。我會定定去拜訪伊，實在是因為伊每擺出國攏會帶轉來一寡世界各國民謠的唱片、錄音帶、影帶。伊轉錄真濟民族音樂予我。包括希臘的Mikis Theodorakis、美國的Pete Seeger佮專門唱東歐民謠的The Pennywhistlers（他們的唱腔間接予我開始迷戀保加利亞的女聲合唱）、蘇格蘭的The Corries、愛爾蘭的The Dubliners、The Chieftains、The Irish Rovers 等，攏是我足kah意、真感動的音樂。

尤其是愛爾蘭音樂copy上濟，除了頂面所講的樂團，也有反叛之歌，以及一寡合輯。自按呢，我愛著愛爾蘭音樂，無葯醫。久年來，有的歌我已經聽過1000擺，親像Wild Rover、Grace、Wild Moutain Thyme、Kilkelly、Green Fields of France等。到CD的年代，我家己也開始有機會買著愛爾蘭音樂。上大宗的是Tower〔淘兒〕唱片行開始佇台北開店（可惜命短）設有愛爾蘭音樂的專櫃。我開始買著愛爾蘭反叛樂團The Wolf Tones以及述事民歌的The Clancy Brothers & Tommy Makem……。仝時站，台北台大的誠品音樂館（嘛是短命）也進真濟愛爾蘭、蘇格蘭、英格蘭的CD。其他只有幾間唱片代理商，加加減減進一寡入來。比較英美的民謠音樂，佇台灣，愛爾蘭音樂確實罕見。我所有的愛爾蘭CD，是久年的走揣，累積。

十幾年前，我佇教會介紹愛爾蘭音樂。介紹到一半，家己吐一個大氣講：「唉！我若無去愛爾蘭迌，絕對毋願死。」此句話親像咒語隨身日思夜夢愛爾蘭……，直到2015、2017年我才有法度去愛爾蘭。佇遐寫生，轉來，寫此本冊。

這是一本極端個人口味的冊，配合我佇愛爾蘭的素描，介紹我個人上意愛的歌。當然，所介紹的歌曲、樂團攏是真優秀的。身為外國人，我知影我所寫無夠好。我所有的只有是分享愛爾蘭民謠／背景故事的熱情。向望讀者會kah意遮的歌，閣受感動。雖然CD歹揣，但是，感謝20世紀上偉大的發明──YouTube，所有介紹的歌，YouTube攏有。

閣來愛講起神學家、台文作家／詩人，已故的王貞文牧師。原本伊答應欲替我用台文翻譯10首愛爾蘭民謠，後來伊身體欠安，我也真歹勢給伊催稿。佳哉，佇此本冊猶有5首伊優美信實的翻譯。愛說明的是，現階段台文的寫作，每一個作者的用字常常有小可的出入。我儘量保留伊的用字（是佮我的用字無仝款的）。

最後，感謝真濟親朋戚友的鬥相共。

老朋友南衡兄，免閣說明矣（永遠感謝您）。

感謝台灣上偉大的唱片行頭家，台南惟因唱片行苦桑國隆兄，無趁錢銀，閣了工，長期替我（佮我過往的囝陳平）對外國訂購愛爾蘭DVD、CD。

鄭謹恩幫我訂愛爾蘭的旅遊住宿。

其他幫忙過我的有誠品冊店的月貴佮伊的同事。以及俊慧、承恩、玉玲、Nina、志忠、小鹿班比一家、宥蓁、琬淑……等。

感謝公報社黃以勒、方雅惠、林麗珍、林美雪佇編輯、美工、台語修訂的辛苦協力。

感謝牽手黃淑純佮查某囝陳安，陪我2015年去愛爾蘭。陳安幫忙翕相。多謝淑純的包容，閣較好聽的歌，聽1000擺嘛會疲勞ho͘ⁿh？

感謝已經過往的媽媽張愛惠佮唱歌／愛音樂的爸爸陳上賞（甚至給我三個小妹號名雅音純音佳音）。爸爸媽媽留落來的錢，予我會當兩擺去愛爾蘭迌。